Los alcaldes d'enantes acoyíen a los visitantes nes puertes consistoriales. Los tiempos camuden y agora recibímoslos a les puertes de la web. Dambos casos ,sei bienveníos a Xixón.

Esta ye una ciudá milenaria y moderna asomada al Cantábricu, el (mare nostrum) de los pueblos que baña esta fastera l'Atlánticu . Somos cuasi 300.000 vecinos y vecines qu'averamos nel sangre, nes piedres y na forma vivir un amiestu de saberes y cultures qu'axunten l'Imperiu Romanu col tren de vapor ,y les tribus que colonizaren la Campa Torres, cola siderurxa. El pasáu y presente de nueso, amíestense nesti Xixón que vos acueye colos brazos abiertos na Rede.

Esta web ye nueva. Más lluminosa n'imaxe, más cenciella d'usu, más enllena conteníos, con mayor accesu p'atopar lo que se gueta y perenllena d'información útil y d'arruelu. Esta web ye Xixón nesti territoriu estrañu que nomamos ciberespaciu. Xixón, ciudá de roca firme, ye tamién ciudá virtual gracies a les nueves teunoloxíes. Equí ta la ciudá de siempres y la que gueta'l futuru. Una ciudá abierta al mundu y amás, prestosa p'afalagavos col paisax, la hestoria, la gastronomía, un clima suavín y afayadizu pa vivir y unos servicios ciudadanos al algame de toos.

Nesta páxina los usuarios podrán atopar tolos servicios qu'ufri l'Ayuntamientu. Dende la información telefónico, fasta la moderna teletramitación de xestiones alministratives per aciu los enllaces del nuesu portal lletrónicu, l'Ayuntamientu ta más cerca. Yá nun hai que pasar pela ventaniella, basta con ponese escontra la pantalla l'ordenador.

La nuesa web foi escoyída varies vegaes como una de les meyores d'España. Emplegando munchu esfuerciu, maxinación, talentu y perres pa siguir meyorando esti serviciu col envís de que l'accesu a la información y conteníos sea meyor pa los ciudadanos . Esta sedrá como fasta agora ,una páxina web de doble direición: un panel pa informar y pa ser informaos. Una ventana pa que la ciudá de nueso xorreza cola andecha los sos ciudadanos y visitantes.

A los que naveguen davezu y a los que faen escala nesti puertu por casualidá, la mio candial bienvenida.

Paz Fernández Felgueroso

Alcaldesa de Xixón