Xixón asitiada nel centru de la rasa costera asturiana y rodiada polos cabos Torres y San Llorenzo defínela'l mar, un mar cambiante'l Cantábricu que foi determinante pal so desarrollu industrial, comercial y urbanu, el so clima e inclusive'l so calter.La presencia del mar, el so golor y el so run pente les cais de Xixón algamen les zones más interiores del municipiu. Nueve playes,unes nel centru de la ciudá, resguardaes ente acantilaos, un puertu deportivu que foi condecoráu en dalgunes ocasiones cola bandera azul pola calidá de les sos instalaciones y un puertu industrial de contino procesu d'ameyora constituyen el frente marítimu xixonés,dieciocho kilómetros de costa que puen pasiase casi en la so totalidá ensin interrupción.

Xixón ocupa una estensión de 181,6 km cuadraos,pertenecientes la gran mayoría a la fastera rural .Una topografía de formes suaves,na qu'apenes hai pendientes superiores a 30%,y asgaya de reagatos y pequeños cursos fluviales, que trescurren ente manches borroses d'eucaliptos y especies autóctones como'l roble, el texu y el castañu.

Más del 90% de la población xixonesa vive nel cascu urbanu,qu'estiéndese a lo llargo de la llínea de la costa. La península de Santa Catalina y el barrio de Cimavilla ,orixen del Xixón de güei, delimiten los ámbitos urbanos hestóricamente dixebraos. Al oeste llocalízase la fastera industrial de la ciudá,dominá pol Puertu de Xixón y polos astilleros, polígonos industriales y barrios d'orixen obreru (La Calzada y el Natahoyo). Al este, a lo llargo de la playa San Llorenzo y hasta la Providencia foron asitiándose la zona residencial, con ensanches como'l barriu l'Arena y ámbitos semiurbanos como Somió. Al sur, ente'l puertu deportivu, la plaza San Miguel y los xardinos de Begoña, estiéndese'l centru hestóricu,coles principales referencies culturales, alministratives y comerciales.Más al sur, El Llano, Pumarín y el Coto son barrios que-y deben l'asitiamientu al procesu d'industrialización que vivió Xixón dende medios del sieglu XIX.