L´hermandá con otres ciudaes ye un tema perimportante nes rellaciones internacionales del Ayuntamientu de Gijón/Xixón. Asina ye que pautamos hermandaes con L´Habana, Albuquerque y Puerto Vallarta n´América; Niort y Novorossiysk n´Europa y Smara n´África. Adulces, tamos hermaniándonos con ciudaes coles que nos xuncen unes rellaciones especiales.
La idea qu´orixinó´l movimientu d´hermandá ente ciudaes surdió n´Europa poco dempués de la Segunda Guerra Mundial.
L´hermandá ente ciudaes ufre la oportunidá de conocer meyor la vida cotidiana de los ciudadanos d´otros países, de comunicase ya intercambiar esperiencies; de poner en marcha proyeutos sobre temes d´interés común como son la integración llocal, mediu ambiente, desendolque económicu o diversidá cultural.
Dende 1993, la Comisión Europea concede añalmente a diez de los meyores proyeutos d´hermandá de ciudaes el premiu "Estrelles d´Oru" pola so contribución a la integración europea y al averamientu ente ciudaes europees.
Les ciudaes hermaniaes ufierten a los ciudadanos la oportunidá d´enanchar los sos horizontes culturales, educativos, civiles y económicos.
Ente otros beneficios destaquen:
Contautos empresariales internacionales.
Mayor conocencia d´otres cultures.
Les families tienen la oportunidá d´agospiar visitantes y estudiantes del estranxeru.
Surdimientu de rellaciones d´aprovechamientu nel terrén económicu, cultural, deportivu , etc.
Xixón, dende l´añu 1979 hermanióse coles ciudaes que siguen darréu:
Niort (Francia)
Novorossiysk (Rusia)
L´Habana (Cuba)
Puerto Vallarta (México)
Albuquerque (USA)
Niort ye un conceyu del oeste de Francia, capital de Deux- Sèvres. Asitiada a orielles del ríu Sèvre, na zona del Poitou-Charentes, el monumentu más importante ye'l castiellu medieval conocíu como'l Donjon de Niort, que tien dos torres cuadraes, xuníes por un edificiu del sieglu XV, que mandó llevantar Enrique II Plantagenet y remató Ricardo Corazón de León.
Niort foi alternativamente propiedá francesa ya inglesa durante la guerra de los 100 años. Nel sieglu XIV, remocicóse'l castiellu y construyóse un nuevu puertu.
Dende'l sieglu XVIII, el castiellu valió de cárcel, catalogándose como monumentu históricu en 1840. En 1896, Niort agospió'l primer congresu d'etnoloxía de Francia y el castiellu úsase por primer vegada como muséu, cola coleición de traxes típicos del Poitevin.
Novorossiysk ye'l puertu más importante del sur de Rusia nel Mar Negru. Ye una ciudá mui vieya que tuvo antaño, nes costes de la Bahía Tsemess, l'asentamientu de Bata, una antigua colonia griega conocida pol comerciu de granu. Tamién mercaron ellí na Edá Media la familia de comerciantes xenoveses Ghisolfi. (Les investigaciones arqueolóxiques ficieron interesantes descubrimientos, pero entovía queda muncho por descubrir.)
Dende 1722, la bahía tuvo dominada pola fortaleza otomana de Dsujuk-Qale. En 1829, dempués de la guerra ruso-turca, la costa fue entregada a Rusia.
Nomada asina pola provincia de Novorossiya, el puertu fue enllaz estratéxicu dientro de los fuertes conocíos como la Llinia Costera del Mar Negru. L'exércitu alemán ocupóla en 1942, pero una pequeña unidá de marinos soviéticos defendieron una parte de la ciudá durante 225 díes.
La ciudá foi lliberada pol Exércitu Roxu'l 16 de setiembre de 1943, distinguiéndose a Novorossiysk col títulu de Ciudá
Heroica en 1973.
L'Habana ye la capital, el mayor puertu y la zona comercial más bultable de Cuba. La ciudá tamién tien la denomación de Ciudá de l'Habana, cola que forma una de les 14 provincies cubanes.
L'Habana ye la mayor ciudá de Cuba y tamién una de les más poblaes de la zona del Caribe. Alcuéntrase a 90 milles de Cayo Oeste, Florida, na costa Noroeste de la isla.
Ye una de les más vieyes ciudaes llevantaes polos europeos nel Hemisferiu Oeste. Fundada en 1515, nel sieglu XVI foi atacada y quemada delles veces por pirates, bucaneros y corsarios franceses. Como munches ciudaes coloniales de la costa, L'Habana ta guardada con muries que protexíen de los pirates y les "potencies estranxeres". Estes muries gocien de la proteición de la UNESCO.
Puertu Vallarta ye una ciudá turística. Asitiada na Bahía de Banderas, nel Océanu Pacíficu, ye la quinta ciudá más grande del Estáu mexicanu de Xalisco. Nomada asina por Ignacio Vallarta, un antiguu gobernador del estáu de Xalisco, la ciudá tien clima tropical (27º) y ta asitiada nuna estrecha rasa costera al pie de les Sierres Cuale y San Sebastián (Sierra Madre del Este ).
De los sos paisaxes naturales rescamplen la xungla (viesca tropical), les catarates y la Playa Mismaloya, que se fizo famosa cuando John Houston rodó ellí la so película << La nueche de la iguana>>; los Arcos, roques impresionantes que surden de la bahía; el palaciu Municipal y el Malecón adornáu con escultures romántiques de bronce, son dalgunes de les alternatives de Puertu Vallarta.
La ciudá divídese en cuatro fasteres importantes: la costa del norte ye la de los hoteles: Olas Atlas y Colonia Zapata; al sur del ríu Cuale, y ente elles la zona Centru. A lo llargo de la costa tamién hai numberoses zones residenciales al Este de la zona hotelera.
El barriu más antiguu ye'l de Colonia Centro, xunta la ilesia de Nuestra Señora de Guadalupe.
Albuquerque ye la mayor ciudá del estáu de Nuevu México, EEUU. Davezu tien un clima secu y soleyeru. Foi fundada en 1706 como asitiamientu colonial español. Orixinariamente yera una comunidá de granxeros y un asitiamientu estratéxicu a lo llargo'l Camín Real. Llevántase a partir d'una plaza central arrodiada d'edificios alministrativos, cases y una ilesia. Esta plaza, conocida como"La ciudá Vieya", ta güei abierta al públicu como muséu, zona cultural y centru comercial.
La ciudá debe'l nome al Duque d'Albuquerque, Don Francisco Fernández de la Cueva, virrei de Nueva España dende 1653 hasta 1660. Quitóse-y la primera " r" pa facilitar la pronunciación a los falantes anglo - americanos.
Albuquerque, asitiada nel norte del Desiertu de Chihuahua, ta nel centru de Nuevu México, y tien una de les mayores altures d'EEUU. Concretamente alcuéntrase ente los 1490 m sobre'l nivel del mar cerca Ríu Grande (nel valle), y los 1950 m baxo les Montañes de Noroeste.
Smara o Semara ye una ciudá asitiada al noreste del Sahara Occidental.
N'actualidá esta ciudá alluga a munchos de los refuxaos de la Intifada.
